عزاء واجب لأهالي بشتيل الكرام

7 شهور من المعاناة تتعالي فيها صرخات أهالي وسكان " منطقة بشتيل البلد " التابعة لحي الوراق بمحافظة 6 اكتوبر بسبب إختلاط مياه الشرب بمياه الصرف الصحي فهي غير صالحة تماما للإستخدام الأدمي و "لونها غامق ورائحتها كريهة وبها شوائب " كما أن المياه تنقطع بشكل دائم عن القرية وإن وجدت فهي ملوثة ، كما وعدهم المسئولين بشركة المياه أكثر من مرة بسرعة إصلاح المواسير وإعادة المياه النقية إلي القرية وحتي الأن لم يوفوا بوعدهم.
تعود المشكلة الي قيام بعض العمال التابعين لشركة المياه سابقا بإصلاح كسور موجودة في مواسير المجاري الموجودة بالقرية وبعد إنتهائهم من أعمال التصليح ، وأثناء دخول الحفار التابع لهم إلي بعض الشوارع وقيامه بأعمال الردم تسبب في كسور اخري ببعض المواسير ونتج عنها طفح كبير لمياه المجاري بمناطق مختلفة داخل القرية ، وبالتالي أحدثت تلفيات بجدران كثير من المنازل بالإضافة إلي تعكر مياه الشرب بمياه الصرف الصحي ، كما قام سكان بعض الشوارع بتركيب مواسير للمياه في شوارعهم وذلك علي نفقتهم الخاصة مثل شارع أحمد الركابي وشارع أحمد عبدالقادر و شوارع أخري اشترك سكانها ودفع كلا منهم 5 جنيهات قيمة تنظيف الشارع مثل شارع " أبو عوف "
و من ناحية اخري أجبر أهالي المنطقة علي شراء المياه أو الحصول عليها من أماكن بعيدة مثل "مستوصف الصراج المنير".
نداءات غير مسموعة من سكان القرية لشركة المياه والتي طلبت منهم شراء مواسير المياه حتي تقوم الشركة بتركيبها ، فدفع سكان بعض الشوارع 23 جنيه لكل ساكن منهم ، وقاموا بشراء مواسير المياه و كسرت من عمال التركيبات بشركة المياه قبل أن يستعملها الأهالي
والأن تطالب الشركة السكان بشراء مواسير جديدة لتركيبها حيث تراوحت أسعار الدفع للسكان من 30 جنيه مثل شارع أبوعوف إلي 550 جنيه مثل شارع مغاوي .
يطالب السكان المسئولين بسرعة التدخل لإنقاذ ما يمكن إنقاذه
هشام محمد 29 سنة ترك سكنه واتجه للسكن بإمبابة ويقول " دفعت 23 جنيه من قبل وشكلهم ضحكوا علينا ودلوقتي بيلموا 30 جنيه و احنا ال جبنا المواسير وتقريبا هيركبوها بعد ما تطلع روحنا ، ويشكو هشام من تجاهل شركة المياه لهم ويقول " ال إيده فالمية مش زي ال إيده فالنار، وربنا يسامحهم".
ويقول سعد حامد 18 سنة من سكان شارع أبوعوف " بقالنا 7 شهور معاناة ومحدش حاسس بينا ، ونقوم بمليء المياه يوميا من مسجد الرحمة الموجود بشارع الصفا والمروة ، وممكن نشتري جركن الميه بجنيه من تجار المياه بالمنطقة .
أما "سيد إبراهيم" 47 سنة نجار بشارع أبو عوف يقول "المية بتجلنا من المجاري وجلنا مسئولين كبار ومفيش نتيجة وقالولنا اعملوه علي حسابكم ، ويضيف أنه تم غلق كثير من المساجد بسبب المياه الملوثة مثل مسجد عباد الرحمن وغيره من المساجد الموجودة بالمنطقة ، حيث لا يصح وضوء المصليين بمياه الصرف الصحي كما أنهم بمجرد شمهم لرائحة المياه التي لا تطاق يقوموا بهجر هذه المساجد ، وإذا صمم شخص علي الصلاة نعطيه كوز مياه يقوم بملئه من أخر الشارع" .
ويقول سيد عثمان فرج 50 سنة " المية لا تنفع في أكل ولا شرب ولا وضوء وفي جوامع كتيرة مقفولة وعشان نصلي لازم نروح شارع الشهيد جوهر "
أم كريم من سكان شارع البصراوي بمنطقة إمبابة ونجلها يسكن شارع أبو عوف و تقول للخميس " إبني وزوجته بيجولي يوميا عشان المية ، وبدهالهم في شنط وبياخدوا توكتوك لحد بيتهم ب 5 جنيه والمفروض الحكومة تصلح المية وسمعت إن إحنا ال هنصلحها" .
ويقول محمد علي 33 سنة مهندس كمبيوتر " المية كانت حلوة و جه الحفار يردم الشارع و كسر المواسير ، ولما قلنا للعمال في مواسير مكسورة قالولنا لو ملقناش حاجة هنحاسبكم عليها ، ومشيوا ومسألوش فينا ، وبلغنا "حنفي" رئيس الفرعية السابق بشركة المياه قال لنا صلحوها علي حسابكم .
وبالرغم من وجود " ضغط عالي " بالقرب من المنطقة ويسهل توصيل مياه نقية إلي القرية إلا أن المسئولين بشركة المياه رفضوا وقالوا للسكان " منقدرش ندخل المقايسة مرتين ونكلف الشركة ، وقال لهم المهندس نبيل التابع لشركة المياه الجديدة بالوراق "لو عايزين تركبوا مواسير المية اعملوها علي حسابكم ".
أيمن السيد عباس 42 سنة بشركة المقاولات المصرية يخبرنا بأن المسئولين قالوا لهم بأن الضغط العالي لم يدخل المنطقة إلا بعد الإنتهاء من حل مشكلة المجاري لأن نشاط الضغط العالي من الممكن أن يغرق المنطقة بأكملها ، وأخبرنا أن الشركة تبيع متر المواسير ب 170 جنيه بينما قام هو وبعض سكان الشارع بشراء المواسير اللازمة للتركيب بتكلفة 13 جنيه للمتر الواحد وقال " إحنا بنشتكي لأن عمال المجاري هما ال بيكسرولنا المواسير "
كما علمت من أحد مصادرنا بشركة المياه بحضور "العميد محي" نائب الدكتور عبدالقوي خليفة رئيس الشركة القابضة للمياه والصرف الصحي إلي المنطقة و بصحبته الأستاذ عبدالمعبود مسئول التركيبات بشركة المياة و عيد رئيس العمال و معهم المهندس نبيل الذي قال للأهالي " المية هنا حلوة ، فردووا عليه اشربها وجربها ".
ويقول" أحمد عبدالرازق المليجي" من سكان شارع أحمد الركابي أنا مشترك وعندي العداد ومدخل مية ، إزاي أبقي مشترك وبدفع إستهلاك مية وسخة؟!! ، وقال لنا بعض العمال ساعدونا واحنا نركبلكم المية" .
ويضيف" حسن محمد" 30 سنة من سكان شارع أحمد الركابي أنه قام بشراء ماتور للمياه وأخذ منه عمال شركة المياه مبلغ 100 جنيه قيمة ماسورة مياه 50 سم ورغم ذلك لا توجد نقطة مياه وإن وجدت فتكون ملوثة ويقول " إحنا هنا مش حسين بأدميتنا ، هما بيعملوا معانا كدة ليه ، ولا مية ولا نور !! . ".
"أحمد عيد "30 سنة من سكان شارع أبو عوف يقول " أخذنا زجازة مية وسخة وطلعنا بيها علي الشركة ومعملتش حاجة ، وشكينا للمهندس منم وجود كسر في إحدي المواسير ولما فحت وصلحها " ولا جت مية وسخة ولا نضيفة " !!.
ويقول "خالد " سكرتير نيابة بدار القضاء العالي وهو من سكان شارع الصفا والمروة عملنا شكاوي كتير وبيجوا ياخدوا عينات وبيمشوا وبنعمل شكاوي غيرها ومفيش فايدة وناس كتيرة زهقت وركبت طرمبات .
أما "ام سيد" 70 سنة وهي من سكان شارع المغاوي تقول " أنا كبيرة فالسن وتعبانة وعايشة لوحدي وكل يوم بنزل من البيت بالجردل عشان اجيب مية ومبقدرش أشيل مية كتير ، حرام عليهم ال بيعملوه فينا " .
ويقول أشرف عبدالفتاح 42 سنة من سكان شارع أحمد الركابي " حرام عليهم بجد و المية دي هتجبلنا بلهارسيا ، ومش هتبان دلوقتي لكن بعد شهرين أو 3 كدة هتلاقوا اثار المية دي بانت في جتنا وابقوا افتكروا كلامي ".
ويقول أيمن ابراهيم 33 سنة من سكان شارع الصغا والمروة " كل يوم بليل بنجيب عربية واحد صاحبنا وبناخد زجاجات فارغة وننادي علي السكان ونملاها من اخر الشارع " .
أما أحمد حسن30 سنة من سكان المنطقة فيقول " أنا عامل علي باب الله ومهتيتي لا تتعدي 20 جنيه وعندي أطفال ومقدرش أدفع 30 جنيه ومش عايز مية" .
ويتسأل الأن سكان القرية ، هل لأنهم سكان منطقة ريفية وعشوائية لا يجدوا من يسأل فيهم ؟!! ، ويطالبوا المسئولين بسرعة إتخاذ اللازم والتدخل في حل الأزمة قبل أن " يقع الفاس بالراس" وتصبح المنطقة بأكملها منطقة وبائية تحمل الكثير من الأمراض و تعتبر شركة مياه الوراق المسئول الأول عن حدوث هذه المشكلة .